jueves, 24 de junio de 2010

Pecha a Escola Municipal de Música e Danza de Ribadeo...


25 de xuño de 2010, ás 20.00 horas no Auditorio Municipal Hernán Naval de Ribadeo producirase o peche da Escola Municipal de Música e Danza (EMMeD) de Ribadeo... por vacacións e ate o mes de setembro, que ninguén se asuste. A EMMeD baixa o telón ao grande, cun festival de fin de curso que mantén a súa vocación de demostrar o feito durante todo o curso 2009/2010 e de divertir ás e aos que se acheguen ao Auditorio.
Por vez primeira todo o festival estrutúrase en base a agrupacións mixtas, algunhas xa existentes e outras creadas para a ocasión, que darán conta dun repertorio que non deixará indiferente a ninguén. Dos instrumentos das alumnas e alumnos da EMMeD sairán as notas de Misión Imposible, da Máquina de Escribir, da Primavera de Vivaldi, dun pasadobre que soará despois dun tango ou dos filmes da factoría Disney. Pero a música non virá soa senón acompañada da danza co cal o espectáculo será aínda maior. Un concerto que promete “moitas sorpresas e gratas lembranzas do que foi este ano” e ao que o claustro de profesoras e profesores da EMMeD de Ribadeo quere convidar a todos e todas as ribadenses.

jueves, 17 de junio de 2010

AVISO!!!


Amigas e amigos, unha vez máis, precisamos da vosa colaboración:

As persoas que teñades fotos de audicións, concertos, ensaios... de calquera agrupación da EMMD durante este curso, as enviedes ao enderezo electrónico esmu.municipal.ribadeo@edu.xunta.es ou as entreguedes no despacho de Dirección.


Moitas grazas

miércoles, 9 de junio de 2010

RECITAL DE PERCUSIÓN


O vindeiro luns 14 de xuño ás 20.30 horas, alumnas e alumnos de percusión dos Conservatorios Profesionais de Música de Monforte, Lugo e A Coruña, ofrecerán un concerto nas instalacións do centro.
Todos eles cursan o último curso do Grao Profesional da especialidade.

Convidámosvos a todas e todos a asistir ao mesmo.

martes, 8 de junio de 2010

COMEZA O PRAZO DE MATRÍCULA!!!

Estimados alumnos/as, pais e nais:

Estando a piques de rematar o presente curso escolar, poñémonos en contacto con vós para informar de que o vindeiro día 10 de xuño, abrirase o prazo de matrícula para o curso 2010-2011. Este só é para o alumnado que cursou estudos no presente curso.
O horario de matrícula será de 16.00 a 20.00 horas de luns a venres, e os sábados de 11.00 a 13.00 horas no despacho de dirección da EMMeD. O prazo para formalizalas rematará o 24 de xuño.

Así mesmo, os horarios das clases colectivas están expostas no taboleiro de anuncios do centro. Estes horarios son inamovibles e poderanse escoller no momento de realizar a matrícula.

martes, 27 de abril de 2010

ACTIVIDADES 3º TRIMESTRE

CALENDARIO ESCOLAR

Días non lectivos:
Ademais das festas de ámbito nacional e da Comunidade Autónoma, consideraranse non lectivos segundo o calendario escolar os seguintes:

- 18 de maio de 2010


Para resolver calquera dúbida, poden consultar o calendario que está colgado no taboleiro de anuncios do centro.


ACTIVIDADES DO TERCEIRO TRIMESTRE

As actividades que a continuación se citan son as que oficialmente están previstas realizar durante o terceiro trimestre sen perxuízo de que poida xurdir algunha outra que sexa de interese.
Darase cumprida información dos ensaios a realizar con suficiente antelación por parte do profesorado implicado.

• Concertos na rúa: - 10 abril ás 20.00 h. a cargo dun grupo de profesores da EMMeD
- 17 abril ás 12.00 h. a cargo do alumnado da EMMeD.

• Audicións:
- Danza/Ballet: 29 abril ás 20.30 h. no Auditorio Municipal Hernán Naval.
- Corda: 3 maio ás 20.30 h. na EMMeD.
- Iniciación á música: 4 maio ás 20.30 h. no Auditorio Municipal Hernán Naval.
- Acordeón/Canto/Gaita: 5 maio ás 20.30 h. na EMMeD.
- Saxofón: 6 maio ás 20.30 h. na EMMeD.
- Frauta/Oboe/Fagot: 7 maio ás 20.30 h. na EMMeD.
- Guitarra: 10 maio ás 20.30 h. na EMMeD.
- Vento-metal: 11 maio ás 20.30 h. na EMMeD.
- Percusión: 12 maio ás 20.30 h. na EMMeD.
- Piano: 13 maio ás 20.30 h. na EMMeD.
- Clarinete: 14 maio ás 20.30 h. na EMMeD.

• Exames de instrumento – do 31 de maio ao 5 de xuño.
• Exames danza/ballet – 5 de xuño.
• Exames de linguaxe musical – do 7 ao 10 de xuño.

• Festival de Fin de curso – 25 de xuño ás 20.00 h. no Auditorio Municipal Hernán Naval.

miércoles, 10 de febrero de 2010

Bota a camiñar a II edición do Certame de Intérpretes Mozos Hernán Naval



















Xa está aberta a inscrición para a II edición do Certame de Intérpretes Mozos Hernán Naval que se vai celebrar os vindeiros 1 e 2 de maio de 2010. O evento está organizado pola delegación de cultura do Excmo. Concello de Ribadeo, a Asociación Amadores da Música, a Deputación de Lugo a través da súa Vicepresidencia Primeira - Cultura e máis a Asociación Cultural Musiqueando. O prazo de inscrición estará aberto até o 16 de abril. Para máis información pódese chamar ao teléfono 982130856 ou ben no enderezo electrónico esmu.municipal.ribadeo@edu.xunta.es
Adxúntase tríptico coas bases así como foto da presentación á que asistiron Mari Luz Álvarez Lastra (concelleira de Muller e Cultura do Excmo. Concello de Ribadeo), Teresa González (presidenta da Asoc. Amadores da Música) e máis Suso López (presidente a AC Musiqueando).

viernes, 5 de febrero de 2010

CONCERTO BENÉFICO

A Escola Municipal de Música e Danza (EMMeD) de Ribadeo, a Asociación Amadores da Música, a Asociación Cultural Musiqueando e máis a Delegación de Cultura do Excmo. Concello de Ribadeo, entidades organizadoras do concerto solidario que se celebrou en Ribadeo co fin de recadar fondos para axudar ás vítimas do terremoto de Haití, entregaron onte mércores os 2000 euros (dous mil euros) que conseguiron tanto coa venda de entradas como coa Fila 0 que estivo aberta no Banco Pastor. Os cartos conseguidos ingresáronse na conta da Cruz Vermella en Lugo, que mostrou dende o primeiro momento o seu apoio a esta actividade, para que sexan destinados ás tarefas de reconstrución do país latinoamericano
As entidades organizadoras queren facer público o seu agradecemento a todas aquelas persoas ou entidades que fixeron posíbel o desenvolvemento dun concerto que contou co apoio e o traballo desinteresado do persoal do Auditorio Municipal Hernán Naval, de Gráficas Ribadeo e máis do claustro de profesoras e profesores da EMMeD de Ribadeo. Así mesmo destacan a boa predisposición mostrada en todo momento polas alumnas e alumnos da Escola Municipal de Música e Danza á hora de planificar ensaios co fin de preparar o concerto. Pero, sen dúbida, o maior agradecemento queren transmitilo ás persoas que se achegaron ao Auditorio Municipal Hernán Naval para presenciar o concerto e a todas e todos aqueles que depositaron os seus donativos na Fila Cero ao longo destes quince días.

martes, 26 de enero de 2010

ANTROIDO 2010

QUERES PARTICIPAR NA CHARANGA DA EMMeD DE RIBADEO?

PODES ANOTARTE EN DIRECCIÓN ATA O SÁBADO DÍA 30 DE XANEIRO.
AS/OS ALUMNAS/OS CON IDADE INFERIOR AOS 9 ANOS DEBERÁN IR ACOMPAÑADOS DO SEU PAI/NAI OBRIGATORIAMENTE.

O PRIMEIRO ENSAIO QUE REALIZAREMOS SERÁ O SÁBADO 30 DE XANEIRO ÁS 16.00 h. NO COLEXIO GREGORIO SANZ.

O DISFRAZ SERÁ DE MEXICANOS. O MATERIAL NECESARIO SERÁ: UN PONCHO E UN SOMBREIRO MEXICANO.

CALQUERA DÚBIDA QUE TEÑADES PODEDES RESOLVELA EN DIRECCIÓN.

martes, 19 de enero de 2010

AVISO IMPORTANTE!

Por motivos alleos á organización do evento, o Concerto Benéfico que se ía celebrar o vindeiro venres día 22 de xaneiro ás 20.30 horas no Cine Teatro trasládase ao Auditorio Municipal Hernán Naval.

Este concerto está organizado pola Escola Municipal de Música e Danza (EMMeD) de Ribadeo, a Asociación Amadores da Música, a Asociación Cultural Musiqueando e máis o Concello de Ribadeo.

O obxectivo principal desta actuación é a recollida de fondos para axudar ás vítimas do sismo ocorrido en Haití polo que se fai un chamamento á participación masiva das e dos ribadenses. O diñeiro obtido pola venda de entradas, a un prezo de cinco euros, será doado á Cruz Vermella que levará a cabo traballos de axuda á reconstrución do país.

lunes, 18 de enero de 2010

CONCERTO BENÉFICO

O vindeiro venres, día 22 de xaneiro, ás 20.30 horas, no Cine Teatro de Ribadeo celebrarase un concerto solidario co fin de recadar fondos para axudar ás vítimas do terremoto acontecido en Haití a pasada semana. Esta actividade está organizada pola Escola Municipal de Música e Danza (EMMeD) de Ribadeo, a Asociación Amadores da Música (entidade promotora da Banda Municipal de Ribadeo), a Asociación Cultural Musiqueando e máis a Delegación de Cultura do Excmo. Concello de Ribadeo.
O obxectivo principal deste evento é a recollida de fondos para axudar ás vítimas do sismo ocorrido en Haití polo que dende a organización se fai un chamamento á participación masiva das e dos ribadenses para respaldar coa súa presenza o apoio, dende a distancia, da vila de Ribadeo ao pobo haitiano.
O diñeiro obtido pola venda de entradas, a un prezo de cinco euros, será doado á CRUZ VERMELLA que levará a cabo traballos de axuda á reconstrcción do país unha vez que rematen as tarefas de retirada dos cascallos e máis de soterramento dos milleiros de mortos que deixa tras de si esta catástrofe natural. Así mesmo prestarán atención tanto médica como sicolóxica ás persoas que saíron vivas da traxedia. A cruz vermella forma parte da Coordinadora galega de ONG´s.
A organización pon en marcha tamén unha Fila Cero co obxectivo de que aquelas persoas que así o desexen ingresen alí o seu donativo malia que non podan asistir ao concerto. A conta estará aberta ao longo deste semana e até o 25 de xaneiro no Banco Pastor co número 0072 0207 11 0000104948.
Alén deste obxectivo principal, as entidades organizadoras fixeron fincapé noutro dos piares que moven a organización deste acto: fomentar o espírito de solidariedade entre as mozas e mozos que forman parte tanto da EMMeD de Ribadeo coma da Banda Municipal ribadense. Esta non é a primeira ocasión na que alumnas e alumnos da Escola e máis da Banda se suman a actos con fins solidarios e tanto dende o centro educativo coma dende a Banda mostran a súa disposición a seguir traballando nesta liña non só en momentos puntuais coma este, tamén ao longo de todo o ano alimentando a conciencia crítica dos rapaces e rapazas e convidándoos a poñer o seu gran de area para lograr un mundo máis xusto e igualitario.

jueves, 17 de diciembre de 2009

FESTIVAL DE NADAL


Un concerto cheo de sorpresas e novidades


A Escola Municipal de Música e Danza (EMMeD) de Ribadeo celebra este
venres día 18 de decembro ás oito do serán no Auditorio Municipal
Hernán Naval o seu tradicional festival de Nadal.
Trátase dun dos eventos clásicos do nadal ribadense que un ano máis
agocha, en palabras do claustro de profesoras/es do centro, “numerosas
sorpresas e algún que outro detalle que se afasta moito do visto en
anos anteriores”. Un dos exemplos é a decoración que non vai ter nada
que ver co nadal. Os temas centrais do concerto son “o mar, a vila e
as xentes de Ribadeo” que irán achegándose ao escenario do auditorio
ribadense a través dun conto “con moitas referencias á sociedade da
comunicación na que vivimos onde as cartas mudan en e-mails”. Unha
historia onde non faltará a música de todas as alumnas e alumnos da
EMMeD de Ribadeo. “Haberá danza, gaita , clarinetes, saxofóns,
guitarras, piano, percusión... E no repertorio xogaremos cos ritmos
heteroxéneos, dende o jazz ás panxoliñas”, sinalaron as profesoras e
profesores do centro.

miércoles, 16 de diciembre de 2009

SUSPENSIÓN DAS CLASES

A Consellería de Educación e Ordenación Universitaria decidiu, como medida de precaución, a suspensión das clases en todos os centros educativos de Galicia durante a xornada de hoxe, 16 de decembro.

Esta medida tómase en base á predición, feita pola Axencia Estatal de Meteoroloxía (AEMET), dun fenómeno meteorolóxico adverso con precipitacións en forma de neve que afectarán á Comunidade Autónoma de Galicia en cotas baixas a partir das 00.00 horas oficial do mércores 16 de decembro.



Consellería de Educación e Ordenación Universitaria

martes, 17 de noviembre de 2009

CONCERTO DE SANTA CILLA





As alumnas e alumnos da EMMeD de Ribadeo, realizarán un concerto de música de cámara na honra da patroa dos músicos. Terá lugar o vindeiro mércores 18 de novembro ás 20.30 h. no salón de actos da Casa do Mar.

Dende a dirección do centro, queremos convidar a aistir ao concerto a todas as persoas que desexen celebralo con nós.

jueves, 5 de noviembre de 2009

COMUNICADO DO CLAUSTRO DE PROFESORES

A raíz das informacións aparecidas nos últimos días en diferentes medios de comunicación e relacionadas co funcionamento da Escola Municipal de Música e Danza (EMMeD) de Ribadeo o seu claustro actual de profesoras e profesores quere facer público o seguinte comunicado:

Dende que se presentara publicamente o pasado 25 de outubro, o curso 2009 – 2010 a EMMeD de Ribadeo funciona con total normalidade tanto no plano académico coma no eido administrativo froito do traballo que realizamos durante as últimas semanas de setembro e comezos de outubro as e os docentes que compoñemos o claustro da EMMeD de Ribadeo. Un traballo que contou e conta, en todo momento, coa colaboración e o apoio constante da responsábel municipal de cultura, Mari – Luz Álvarez Lastra, a quen agradecemos o seu impulso e alento para a posta en marcha deste curso.
Todo elo nun ano que o centro afronta cun considerábel aumento de matrícula con respecto ao curso pasado e con máis especialidades no seu currículum académico. Conseguir un maior número de alumnas e alumnos así como mellorar a oferta docente é froito do traballo realizado ao longo do curso pasado polas profesoras e profesores da EMMeD de Ribadeo.
O noso esforzo e adicación evidenciouse nos diferentes festivais e actuacións celebrados cun grande éxito tanto de público coma tamén de crítica, recibindo a felicitación dos pais e nais e tamén dos alumnos e alumnas do centro. O seu respaldo repítese cada día cando acuden á escola, ben eles mesmos para recibir formación ou ben co seu neno ou a súa nena, o que nos convida a seguir traballando arreo para continuar adiante con este proxecto educativo – musical que é a EMMeD de Ribadeo.
As continuas críticas sen fundamento e máis as informacións erróneas verquidas nas últimas semanas sobre o traballo que nestes momentos se desenvolve na EMMeD de Ribadeo non significa senón o menoscabo da imaxe e o prestixio do que goza o centro tanto a nivel comarcal coma tamén no conxunto dos centros educativos – musicais de Galicia.


Ribadeo, 5 de novembro de 2009

viernes, 30 de octubre de 2009

NOTA INFORMATIVA

Estimados alumnos/pais:



Unha vez comezado o curso 2009/2010 poñémonos en contacto con vós, para facilitarvos o calendario escolar, as actividades programadas para o primeiro trimestre e o horario de titorías de cada profesor.Tratando en todo momento de establecer unhas relacións fluidas e cordiais cos pais dos alumnos, para que a coordinación e a colaboración entre a acción do centro e a da familia sexan reais e efectivas.



CALENDARIO ESCOLAR

Período de vacacións:
Nadal: dende o 23 de decembro ata o 10 de xaneiro (ambos inclusive).
Semana Santa: dende o 27 de marzo ata o 5 de abril (ambos inclusive).
Verán: a partires do 25 de xuño.

Días non lectivos:
Ademais das festas de ámbito nacional e da Comunidade Autónoma, consideraranse non lectivos segundo o calendario escolar os seguintes:
- 2 de novembro de 2009
- 18 de maio de 2010

Para resolver calqueira dúbida, poden consultar o calendario que está colgado no taboleiro de anuncios do centro.




ACTIVIDADES DO PRIMEIRO TRIMESTRE

As actividades que a continuación se citan son as que oficialmente están previstas realizar durante o primeiro trimestre sen perxuízo de que poida xurdir algunha outra que sexa de interese.
Darase cumprida información dos ensaios a realizar con suficiente antelación por parte do profesorado implicado.

· Concerto de Santa Cilla - 18 novembro ás 20.30 h. no Salón de Actos da Casa do Mar.

· Concertos no Mercado de Nadal – 4, 5 e 7 de decembro no Parque Municipal.

· Exames de instrumento – do 9 ao 12 de decembro.

· Festival de Nadal – 18 de decembro ás 20.00 h. no Auditorio Municipal Hernán Naval.




TITORÍAS

- Olalla Canoura: Luns de 17.00 a 17.30 h.
Mércores de 16.15 a 16.45 h.

- Valentín Prieto: Luns de 16.30 a 17.00 h.
(Prisco) Luns de 19.30 a 19.45 h.
Xoves de 17.15 a 17.30 h.

- Martín Bucki: Luns de 21.45 a 22.00 h.
Mércores de 15.30 a 16.00 h.
Mércores de 19.15 a 19.30 h.

- Marcos Rodríguez: Luns de 19.15 a 19.30 h.
Martes de 17.30 a 17.45 h.
Mércores de 18.15 a 18.30 h.
Venres de 21.45 a 22.00 h.

- Luis Rodil: Martes de 11.30 a 12.00 h.
Venres de 22.15 a 22.45 h.

- Dolores Fernández: Mércores de 14.00 a 15.00 h.

- Rubén Solloso: Venres de 19.45 a 20.45 h.

- Ismael Porto: Martes de 16.15 a 16.30 h.
Mércores de 16.45 a 17:00 h.
Xoves de 18.30 a 19.00 h.

- Eugenio Lage: Luns de 18.15 a 18.45 h.
Luns de 20.45 a 21.15 h.

- David Ballester: Martes de 20.15 a 20.45 h.
Mércores de 16.45 a 17.15 h.

- Hugo García: Luns de 18.30 a 19.00 h.
Xoves de 18.00 a 18.30 h.

- Tamara García: Luns de 17.00 a 17.30 h.
Martes de 17.00 a 17.30 h.

- María Justo: Venres de 16.30 a 17.30 h.

- Montserrat Expósito: Xoves de 13.30 a 14.30 h.

- Juan Barcón: Mércores de 19.45 a 20.45 h.


Agardando a participación de todas e todos, convidámosvos a presentar propostas ou iniciativas que vos parezan de interese.




O Claustro de profesores

martes, 22 de septiembre de 2009

Comeza un novo curso!!!

Benqueridos pais, nais e alumnos da Escola Municipal de Música e Danza de Ribadeo:


Dámosvos a benvida ao novo curso escolar 2009/2010. Como todos os anos o noso compromiso é o de ir avanzando na mellora do centro, para o cal é imprescindible a vosa colaboración. Partindo desta premisa convocámosvos a unha reunión o vindeiro venres 25 de setembro ás 20.00 h. no salón de actos da Casa do Mar (1º andar), na que trataremos os seguintes temas:

- Presentación oficial do curso.

- Información da situación actual do centro.

- Marcación dos horarios das clases de Linguaxe Musical, Iniciación á Música e Danza/Ballet.

- Fixación do calendario para marcación das clases individuais.



Agardando a vosa presenza, recibide un cordial saúdo.

sábado, 4 de julio de 2009

Actividades en Xullo!!

  • Día 4 de Xullo - I FESTIVAL DE BANDAS DE MÚSICA INFANTIS, ás 19:30 horas no Quiosquo da Música en Ribadeo.

Dentro da I XORNADA MÚSICO-CULTURAL DE RIBADEO:

  • 13 a 17 de Xullo Audicións activas da Música Clásica.
    20 a 24 de Xullo Audicións activas da Música do século XX.
    Para poder ampliar a nosa cultura sobre os distintos periodos da música, para aprender a escoitar, e saber o que se escoita.
  • 13 a 17 de Xullo Cursiño de Informatica Musical.
    Ten como obxectivo de acercar os participantes aos programas de edición de partituras, como tamén, para que poidan aprender a facer xogos de melodías.
  • 6 a 10 de Xullo Taller de Música Tradicional.
    A Música Tradicional cada vez está un pouco máis apartada da xuventude, polo tanto, queremos ensinarlles que a Música Tradicional pode ofrecer clases moi divertidas.
  • 13 a 17 de Xullo Cursiño de percusión para pais e fillos.
    Neste apartado o que queremos é dar a posibilidade de mostrar aos pais, o traballo que realiza o seu fillo durante o curso escolar, ao mesmo tempo, que aprenda unhas poucas nocións sobre a materia, para que durante o curso lectivo poida axudar ao seu fillo na casa.
  • 20 a 24 de Xullo Cursiño de Reparación e mantemento do Clarinete/Frauta.
    Uns dos obxectivos principais, é achegar ao pai/nai a esta materia, para poder axudar ao nen@, a reparar o instrumento. Traballarase a desmontaxe e montaxe completa do clarinete/frauta para a limpeza, cambio de zapatillas, muelles, etc...
  • 13 a 17 de Xullo Curso de Guitarra – Taller de acompañamento.
    Aprender os mecanismos ritmicos e melódicos dos distintos estilos musicais.
  • 20 a 24 de Xullo Curso de Guitarra – Taller Melódico.
    Aprender os recursos técnicos e teóricos básicos na execusión e interpretación de melodías.
  • 27 a 31 de Xullo Encontro de Orquestra e Saxofóns
    13 a 17 de Xullo Encontro de Grupo de Clarinetes.
    Curso adicado á pratica do Saxofón/Clarinete dentro dunha agrupación, na que se traballará repertorio proprio destes instrumentos así como adaptacións doutros estilos.
  • 27 a 31 de Xullo Encontro de Música de Cámara.
    Neste encontro, realizaremos varias formacións de grupos de música de càmara, para praticar o máis variado repertorio, xogar coas distintas carectirísticas de cada instrumento, e para que os alumnos se sociabilizen entre todos.
  • 16 de Xullo - Ensemble de Clarinetes da E.M.M.eD., no Pregón do Carmen en Ribadeo.
  • 18 de Xullo - Participación da Banda Municipal de Ribadeo, no Festival de Bandas en Pola de Siero (Asturias)
  • 25 de Xullo - XIV Festival de Bandas Ribadeo, ás 19:00 horas, na Praza da Música de Ribadeo.


jueves, 18 de junio de 2009

Aqui está a IV edición Campamento Musical Ribadeo 2009

Xá podedes baixa-lo boletín de información e inscrición nas paxinas: http://www.ribadeo.org , http://www.fgbmp.net , http://www.radiobanda.com .

Para ter máis información, chamade aos teléfonos: 982130856 ou 629881930, tamén a través do correo electrónico: amadoresdamusica@hotmail.com ou esmu.municipal.ribadeo@edu.xunta.es

Estamos esperándovos polo tanto, Animádevos.

miércoles, 3 de junio de 2009

2 citas moi importantes para a E.M.M.eD. de Ribadeo.

Entrevista ao Director da E.M.M.eD., na Localia ORT no programa "Plató Aberto".

O Director da Escola Municipal de Música e Danza (EMMeD) de Ribadeo e da Banda Municipal de Ribadeo (BMR), Lourenço Cruz, participará esta noite no programa de Localia ORT "Plató Aberto". Nel dará a coñecer o traballo que se realiza a nivel educativo - musical tanto na EMMeD coma na Banda Municipal así como os futuros proxectos a presentar.
Así que xa sabedes, a cita está en Localia ORT a partir das once da noite.


Lourenço Cruz, Director da E.M.M.eD. viaxará a Bizkaia (Getxu).

O vindeiro 5 de Xuño o Director da E.M.M.eD. viaxará a Bizkaia (Getxu), como convidado pola (UEMYD) Asociación Española de Escuelas de Música y Danza, para presentar a E.M.M.eD. e intercambiar realidades e inquietudes, para detectar pontos comuns que poidan xenerar futuras coloboracións.
Está previsto un encontro de escolas de música na sede da "Asociación de Escuelas de Música del País Vasco" - Euskal Herriko Musika Eskolen Elkartea (EHME), en Getxo (Bizkaia).
A (EMYD) Unión de Escolas de Música e Danza e a federación estatal de asociacións autonómicas de Escolas de Música. Actualmente está composta por seis asociacións autonómicas:
EHME - Asociación de Escuelas de Música de Euskal Herría
AGEMM - Asociación Galega de Escolas Municipáis de Música
ADEMUM - Asociación de Escuelas Municipales de Música y Danza de Madrid
ACEMYD - Asociación Canaria de Delegados de Escuelas de Música y Danza
AEMMDAS - Asociación de Escuelas Municipales de Música y Danza de Asturias

lunes, 1 de junio de 2009

Recta final do Curso 2008-2009!!!!!!

Audicións e Concertos:

  • Día 06 de Xuño 2009, ás 20:30h - Concerto-Presentación da "ORQUESTA DE CÁMARA DE RIBADEO", no Cine-Teatro de Ribadeo.
  • Día 10 de Xuño 2009, ás 20:30h - Audición dos alumnos/as da clase iniciación á Música, no Auditorio Municipal "Hernán Naval" de Ribadeo.
  • Día 11 de Xuño 2009, ás 20:30h - Audición dos alumnos/as da clase de Piano, nas instalacións do Centro.
  • Día 12 de Xuño 2009, ás 18:00h - Actuación do Grupo de Danza/Ballet, no "Festival de Loita Contra o Cancer", no Auditorio Municipal "Hernán Naval" de Ribadeo.
  • Día 19 de Xuño 2009, ás 10:00h e 12:00h - "Concertos Didácticos" para os colexios, no Cine-Teatro de Ribadeo
  • Día 21 de Xuño 2009, ás 13:00h e 17:00h - Participación do Grupo de Danza/Ballet e máis Agrupación Musical da E.M.M.eD., no "II Encontro de Escolas Municipais de Música" en Vigo (Pontevedra) organizado pola A.G.E.M.M.
  • Día 26 de Xuño 2009, ás 19:00h - "Festival Fin de Curso" no Auditorio Municipal "Hernán Naval" de Ribadeo.

Exames finais:

  • Do día 1 ata 4 de Xuño de 2009 - Exames de Linguaxe Musical.

Nota: Para saber que día, hora e programa a traballar, que lle corresponde consultar ao seu profesor.

Esperamos seguir contando co seu apoio e co seu aplauso nos concertos, e aproveitamos para desexar moita sorte para aqueles que teñen que afrontar os exames finais.

A Dirección do Centro.